మిహిరా మాధవం : భాగం-3

PSLV మూడో స్టేజ్ సౌరయాన్-1 నుంచి విడిపోయింది.కల్పనా క్యాప్స్యూల్ లో ఉన్న వ్యోమగాములు ముగ్గురికీ గ్రౌండ్ కంట్రోల్ నించి మూడో స్టేజ్ పూర్తైనట్టు సిగ్నల్స్ వస్తున్నాయి.

నాలుగో స్టేజ్ లో ఉన్న సౌరయాన్-1 కంట్రోల్ బాధ్యతలు ఇప్పుడు మాధవ్ నిర్వహిస్తున్నాడు.టెక్నికల్ గా చాలా చురుకైన వాడు కావడం చేత సౌరయాన్-1 మిషన్ ని కంట్రోల్ చెయ్యడానికి మాధవ్ ఏకగ్రీవంగా ఎన్నికయాడు.శశాంక్ అతనికి కో-ఆర్డినేటర్ గా వ్యవహరిస్తున్నాడు.

 ”ఈటా..సౌరయాన్-1 అప్రోచింగ్ ISS,ప్లీజ్ పర్మిట్ డాకింగ్..”

 సౌరయాన్-1 నించి ISS స్పేస్ స్టేషన్ కి సిగ్నల్ అందించాడు మాధవ్.     

 వాళ్ళు ముగ్గురూ ఆతృతగా ISS ని చేరుకునే సమయం కోసం నిరీక్షిస్తున్నారు.

ISS దగ్గర వ్యోమగాములు సౌరయాన్-1 షటిల్ లోని ఇంధనం చంద్రుడి ఉపరితలాన్ని చేరుకుని మళ్ళీ తిరిగి ISS వచ్చే వరకూ సరిపోతుందో లేదో చెక్ చేసుకుని, అవసరమైతే అదనపు ఇంధనాన్ని అక్కడే నింపుకుని, సౌరయాన్-1 కి ఏదైనా ప్రమాదం వాటిల్లితే దాన్ని సరిచేసుకునే ఎక్విప్ మెంట్ కూడా అక్కడి నించే సమకూర్చుకుని చందమామ వైపు తమ ప్రయాణాన్ని కొనసాగిస్తారు.

ఇంటర్నేషనల్ స్పేస్ స్టేషన్ (ISS) :

ఇది అమెరికా,రష్యా,జపాన్,కెనడా మరియు యూరోపియన్ యూనియన్ లు సంయుక్తంగా నిర్వహిస్తున్న స్పేస్ స్టేషన్.

ఇందులో శాస్త్రవేత్తలు రీసెర్చ్ చేసుకోవడానికి అనుగుణంగా అధునాతన రీసెర్చ్ ల్యాబ్ లు అమర్చబడ్డాయి.ఇది భూమి చుట్టూ తిరుగుతూ శక్తివంతమైన ఆస్ట్రనామికల్ టెలిస్కోపుల సాయంతో సుదూర తీరాల్లో ఉన్న విశ్వ రహస్యాలను అన్వేషిస్తుంది.

ఇక్కణ్ణించి డిస్కవరీ,కొలంబస్ మరియు మిర్,సోయజ్ వంటి స్పేస్ షటిల్స్ ఆపరేట్ చెయ్యబడతాయి.

విశ్వంలో జీవుల ఉనికిని కనుక్కోవడానికి కావలసిన సదుపాయాలతో కూడిన జీవరసాయన ల్యాబులూ,ఉల్కలు-తోక చుక్కలు మొదలైన వాటి ఉపరితలాల నుంచి,ధూళి నుంచీ లభించే రసాయన మూలకాల గురించి అధ్యయనం చెయ్యడానికి జియో మరియు ఆర్గానిక్ కెమిస్ట్రీ ల్యాబ్,సుదూర తీరాల్లో ఉన్న నక్షత్రాలను,సౌరకుటుంబాలను  గురించి అధ్యయనం చేయడానికి ఆస్ట్రో ఫిజిక్స్ ల్యాబ్,స్పేస్ షటిల్స్ కి కావాల్సిన ఇంధనాన్ని సమకూర్చగల సదుపాయాలూ,స్పేస్ స్టేషన్ ను మరమ్మతులు చెయ్యడానికి కావాల్సిన ఎక్విప్ మెంట్ మొదలైనవన్నీ ఇంటర్నేషనల్ స్పేస్ స్టేషన్ లో ఉంటాయి.  

ఇది భూమికి 320 నుండి 347 కిలోమీటర్ల ఎత్తున లో-ఎర్త్-ఆర్బిట్ (LEO) లో పరిభ్రమిస్తూ తన కార్య కలాపాలను నిర్వహిస్తూ ఉంటుంది.

మాధవ్,శశాంక్ లిద్దరూ డైరెక్షన్స్ ప్రకారం ISS ను సమీపించడానికి సిద్ధమయ్యారు. ISS కంట్రోల్ విభాగంతో సౌరయాన్-1 కంట్రోల్ కనెక్ట్ చేసింది మిహిర.ISS లోని వారికి తమ కో-ఆర్డినేట్స్ పాస్ చేసారు మాధవ్,శశాంక్.

“ఆల్ఫా..అలర్ట్..సౌరయాన్-1 కమింగ్-ఇన్..”

“ప్లీజ్ ప్లేస్ ద షటిల్ ఇన్ ద డాక్..”

ISS కంట్రోల్ నుంచి వచ్చిన ఆర్డర్స్ పాటిస్తూ షటిల్ ని డాకింగ్ పొజిషన్లోకి మార్చాడు మాధవ్.

సౌరయాన్-1 ఇప్పుడు ISS స్పేస్ స్టేషన్ తో అనుసంధానం అయింది.

“Brilliant buddy!” శశాంక్ మాధవ్ ని అభినందిస్తూ అన్నాడు.

“Excellent!” మాధవ్ కి షేక్ హ్యాండ్ ఇస్తూ అంది మిహిర.

“Thank you!” మృదువుగా ఆమె కరచాలనాన్ని అందుకున్నాడు మాధవ్.ఆరు నెలల కాలంలో ఎప్పుడూ కోల్డ్ వార్ చేసుకోవడమే గానీ ముఖా ముఖీ మిహిర మాధవ్ ని అభినందించడం ఇదే మొదటి సారి.

“ఇదేమిటి ? వీళ్ళిద్దరూ కొట్టుకోకుండా,తిట్టుకోకుండా ఇంత సౌమ్యంగా షేక్ హ్యాండ్స్ ఇచ్చుకుంటున్నారు?”  ఆశ్చర్యంతో కళ్ళు విప్పార్చి అయోమయంగా మొహం పెట్టాడు శశాంక్. 

తాము ISS తో అనుసంధానం అయినట్టు కన్ఫర్మేషన్ మెసేజ్ ISRO Ground centre కి పంపించాడు మాధవ్  శశాంక్ మొహం చూసి చిరునవ్వు నవ్వుతూ.

కల్పనా క్యాప్స్యూల్ ఎంట్రన్స్ తలుపులు ISS లోపలికి తెరుచుకున్నాయి.వ్యోమగాములు ముగ్గురూ ISS లోకి ప్రవేశించారు.

అప్పటికే అక్కడ ఉన్న వివిధ దేశాల వ్యోమగాములు తమని తాము పరిచయం చేసుకుని మాధవ్,మిహిర,శశాంక్ ల మొట్ట మొదటి అంతరిక్ష యాత్ర సక్సెస్ అవ్వాలని ఆల్ ద బెస్ట్ విషెస్ తెలియజేసారు.

ఆ రాత్రి కొత్తగా వచ్చిన ముగ్గురు వ్యోమగాములకీ స్పెషల్ డిన్నర్ పార్టీ అరేంజ్ చెయ్యబడింది.

డిన్నర్ తరవాత అరేంజ్ చెయ్యబడిన డ్రింక్స్ పార్టీలో రెచ్చిపోయి ఎంజాయ్ చేసేసాడు శశాంక్, మాధవ్ ఎంత వారిస్తున్నా వినకుండా.

డిన్నర్ పూర్తయాక అంతా ఎవరి దారిన వాళ్ళు వెళ్ళిపోయారు.

***********************************

కల్పనా క్యాప్స్యూల్ లో ఇంధనం లెవెల్స్ చెక్ చేస్తున్నాడు మాధవ్.

సాయానికి వస్తానన్నాడు శశాంక్.శశాంక్ పరిస్థితి చూసి అతణ్ణి పడుకోమని చెప్పి ఇంధనం లెవెల్స్ చెక్ చెయ్యడానికి ఒంటరిగానే వచ్చాడు మాధవ్.

మిహిర అంతరిక్షంలోంచి భూమిని ఫోటోలు తియ్యడానికి మిషన్ కంట్రోల్ రూములోని కెమెరా టెలిస్కోప్ దిశ సవరిస్తోంది.

కాసేపటి తరవాత ఆమెకి అంతరిక్షంలో పరిభ్రమిస్తూ నక్షత్రాల మధ్య నీలి రంగులో,అక్కడక్కడా అతికించినట్టున్న పచ్చని పచ్చిక బయళ్ళతో నయనానందకరంగా మిల మిలా మెరిసిపోతున్న వసుంధరా సాక్షాత్కారం అయింది.

కళ్ళింతలు చేసి ఆ దృశ్యాన్ని తన కళ్ళతో పాటు కెమెరా కంటిలోనూ బంధించింది మిహిర.

“మార్వెలస్!” ఒక్క అంగలో మాధవ్ ఉన్న చోటుకి పరుగున చేరుకుంది ఆమె.

మాధవ్ ని చూడగానే పరిగెత్తడం వల్ల వచ్చిన ఆయాసంతో వొగరుస్తూ నిలబడింది.

“హేయ్,ఎందుకలా ఆయాసపడుతున్నావు?” తలెత్తి చూసి ఎదురుగా ఉన్న మిహిరని ప్రశ్నించాడు మాధవ్.

“త్వరగా పద,నీకొకటి చూపిస్తాను” మాధవ్ చేయి అందుకుని తనతో పాటే మళ్ళీ కంట్రోల్ రూమ్ లోకి పరుగు తీసింది మిహిర.

టెలిస్కోప్ ని చేరుకోబోతూ ఏదో గుర్తుకు వచ్చిన దానిలా ఆగిపోయి నిలుచుంది మిహిర.

“హేయ్ మిహిరా,ఏమైంది?” అడిగాడు మాధవ్.

“ఒక్క నిమిషం..”

మాధవ్ వెనక్కి వచ్చి నిలబడింది.

“సర్ ప్రైజ్!” మాధవ్ రెండు కళ్ళనీ తన అరచేతులతో గట్టిగా మూసేసింది.

టెలిస్కోప్ ఐ-పీస్ ని రెండో చేత్తో మాధవ్ హైటుకి సరిపోయేలా అడ్జస్ట్ చేసింది.

నెమ్మదిగా తన అరిచేతులని మాధవ్ కళ్ళ మీది నించి విడదీసి,”ఇప్పుడు చూడు” చెప్పింది.

టెలిస్కోప్ ఐ-పీస్ లోంచి కనిపిస్తున్న భూమి సౌందర్యాన్ని చూసి చకితుడయ్యాడు మాధవ్.

“వావ్,వండర్ ఫుల్” అప్రయత్నంగానే అనేసాడు. 

అందులోంచి కనిపిస్తున్న భూమిని ఇద్దరూ మార్చి మార్చి చాలా సేపు తన్మయత్వంతో అలాగే చూస్తూ నిలుచున్నారు.

“హేయ్,మన భారతదేశం ఇందులోంచి ఎలా కనిపిస్తుందో చూద్దామా?” అడిగాడు మాధవ్.

“రాత్రి పూట మరీ అందంగా కనిపిస్తుందట” సునీ(సునితా విలియమ్స్) చెప్పింది,చటుక్కున అంది మిహిర.

“ఊహూ, మరి నేనూ ?” మారాం చేస్తూ అడిగాడు మాధవ్.

“సిగ్గు లేని అబ్బాయి,ఎప్పుడూ సొంత డబ్బాయే” అంది మిహిర సిగ్గు పడుతూ.

“అంతేగానీ నేనందంగా ఉన్నానని ఒప్పుకోవనమాట!” ఇంకాస్త గోముగా అడిగాడు మాధవ్.

“ఊహూ..” బెట్టు చేసింది మిహిర.

“సరే అయితే! నువ్వొప్పుకునే వరకూ ఈ లెన్స్ నా దగ్గరే ఉంచుకుంటానులే, ఒప్పుకున్నాక వచ్చి తీసుకో” చటుక్కున  టెలిస్కోప్ ఐ-పీస్ తీసేసి తన సూట్లో దాచుకున్నాడు మాధవ్.

                                               (ఇంకా ఉంది..)